ЛОВЗ принтти колдойлу. Мүмкүнчүлүгү чектелгендер да акча таба алат

Кыргызстанда мүмкүнчүлүгү чектелген мекендештерибизге ар тараптуу колдоо көрсөткөн социалдык долбоор иштейт. Ал ЛОВЗ ПРИНТ деп аталып, мүмкүнчүлүгү чектелгендердин таланттарын ачып, өз алдынча акча таап кеткенге шарт түзөт.

Долбоордун идеясы: “Биз бирөөдөн жардам сурабай, өз күчүбүз менен акча тапкыбыз келет”

ЛОВЗ принт долбоорундагылардын алдыга койгон максаттары чоң

Мүмкүнчүлүгү чектелген адамдарга колдоо көрсөтүү идеясы Кыргыз билим берүү ассоцациясынын аткаруучу директору Ольга Юн жана “Эпицентр” коомдук фондунун аткаруучу директору Николай Лучкинге таандык. Николай Кыргызстанда мүмкүнчүлүгү чектелген жарандардын укугу тиешелүү деңгээлде корголбогонун, шаарда аларга ыңгайлуу шарттар такыр эле каралбаганын баса белгилейт. Мындан улам, алар мүмкүнчүлүгү чектелгендерге моралдык жана финансылык жактан колдоо болсун деп, бул долбоорду жазып, иштеп чыгышкан.

Николай Лучкин бул иште жүрөгү менен берилип иштейт

“Биз эч кимден жардам, кайыр сурагыбыз келбейт. Өзүбүздүн күчүбүз, эмгегибиз менен акча таап татыктуу жашай алабыз” деген ураанды карманган ЛОВЗ принт долбоору 1 жылдан ашык убакыттан бери улам жаңы ийгиликтерди жаратуунун үстүнөн иштеп келет.

Белгилей кетсек, аталган долбоордун катышуучулары өтө эмгекчил, таланттары ташкындаган жана жашоону бүткүл жан-дили менен сүйгөн адамдар.

2016-жылдын май айларында башталган долбоордо 20дан ашуун бала окуп чыкты. Андан бери мүмкүнчүлүгү чектелгендер полиграфиялык иштерди үйрөнүшүп, чыгармачылыктарын кеңейтишти, компьютердик программалар менен таанышып, дизайн, монтаж жасоо өңдүү иштерди өздөштүрүштү. Адамдар менен пикир алышуу, оратордук чеберчилик, PR, маркетинг, SMM кызматтары боюнча да сабак алышты.

Долбоордун катышуучулары кызуу иш үстүндө

ЛОВЗ принттин башкы максаты - пенсияга жана пособияга байланып, элден кайыр сурабай, өз алдынча акча тапканга үйрөнүү, кыялдарды ишке ашыруу.

Бул курстардан өткөн балдар өзүлөрүнө керектүү профессионалдык чеберчиликтерди өздөштүрүп алышкан соң жумушка орношуп, же чакан бизнесин ачып, иштетип кетиши толук мүмкүн.

“Долбоорлор даяр. Аны ишке ашырууга мекендештерибизден колдоо гана керек”

ЛОВЗ ПРИНТ долбоору 1-группасын окутуп, эми 2-группанын үстүнөн иштеп жаткан кези. Бул жолкусунда балдар социалдык жана бизнес долбоор жазганды өздөштүрүп жатышат.

Аталган долбоордун жетекчиси Николай Лучкиндин айтымында, учурда мыкты бизнес долбоорлор жазылып, эми аларды ишке ашыруу үчүн демөөрчүлөрдү табуу гана калды.

Долбоор жазуу боюнча тренинг учурунда

Төмөндө биз ЛОВЗ принттин катышуучуларын маекке тарттык. Төлөбек Бейшенбеков – долбоордо улуусу.

Төлөбек мырза буклет жасоо ишин өздөштүрдү

ЛОВЗ принт тууралуу интернеттен көрүп калып, катышууну чечкен.

“Өзүм 11-класстан бери балдак менен басам. Бул жактан бизге пайдалуу нерселерди өздөштүрдүк. Негизи эле Кыргызстанда мүмкүнчүлүгү чектелген жарандарга ылайыктуу шарттар, алардын билим алып, өсүп-өнүгүүсүнө жолдор түзүлгөн эмес. Мен буюрса дал ушул багытта мүмкүнчүлүгү чектелгендерге колдоо болсун үчүн “Оку жана үйрөн”, “Ийгиликке чогу барабыз” деген долбоорлорумдун үстүнөн иштеп жатам. Алар, буюрса, билим берүү, реабилитациялоо багыттарында иш алып барат”.

Дастан: “Биз сөзсүз бутубузга турабыз”

ЛОВЗ принттин 1-группасынан окуп бүткөн Дастан азыр 18 жашта. Ал учурда инновациялык технологиялар жана информатика колледжинде дистанциондук түрдө билим алат.

Дастан полиграфиялык иштердин майын чыгарат

Дастан:

“Өзүм тууралуу айтсам, 1-класска чейин жакшы эле басып жүрчүмүн. 1-класстан баштап кулай баштагам. Доктурлар жүлүндө киста өскөнүн айтышты. 5 жолу операция болуп, анын 2-ийгиликсиз өттү. Кийин белгилүү болгондой, бул жерде доктурлардан да ката кетиптир. Ошентип майыптар арабасына отуруп калдым. Келечекте мен бизге окшогондорго жардам, үмүт бергим келет. Буюрса, баары алдыда, бутубузга турабыз. Мен Аллахтын бул сыноосуна да ыраазымын. Балким, мага мындай сыноо берилбесе жаман адам болмокмун. Чоң сыноолордун артында мындан да чоң Жараткандын белеги турарына ишенем”.

Дастан менен маек куруп жатып, анын билимге умтулган, активдүү, жоопкерчиликтүү, элдерге жардам берсем экен деген аруу тилектерин байкадык. Дастан долбоордун 1-группасында жакшы окуп, азыр ал ушул долбоордун координатору болуп иштейт. Анын эң чоң кыялы - чоң үй-бүлө куруп, үлгүлүү ата болуу.

Долбоордун дагы бир катышуучусу - 19 жаштагы Иффат. Ал бул жылы 2-ирет ЛОВЗ принтте окуусун улантып жатат. Иффат 1-жылы полиграфиялык иштерди өздөштүрсө, учурда видеомонтаж жасаганды үйрөнүүдө. Ага баарынан да долбоордогу оптимист эже-байкелер менен бирге окуган жагат.

Иффат видеомонтаж жасоону үйрөнүп жатат

Алия Табалдиева: “Мүмкүнчүлүгү чектелгендер бидимден артта калбашы керек”.

Маектештерибиздин арасынан өзүнүн мыкты билими жана оптимисттик маанайы менен бизди Алия Табалдиева таң калтырды. Алия Кыргызстандагы мүмкүнчүлүгү чектелген балдардын ата-энелерин бириктирген “Вперед” коомдук бирикмесинин атынан Японияга барып келген. Япониядагы мүмкүнчүлүгү чектелген адамдардын турмуш-шарты, алардын билим алуу, жумуш менен камсыз болуусу тууралуу жакындан таанышып, алган билимин эми Кыргызстанга колдонгусу келет.

Алия баарынан да билим алууга чоң көңүл бурат

Алия өз байкоолору менен бөлүштү:

“Чет өлкөлөрдө мүмкүнчүлүгү чектелгендер Кыргызстандагыларга караганда алда канча социалдашкан. Ал эми бизде мындай адамдар үйдөн чыккандан коркуп, 4 дубалдын ичинде эле камалып отурушат. Анткени шаарга чыгышса, транспорт маселеси, жолдо жүрүүдөн аябай эле кыйналышат. Анан дагы мүмкүнчүлүгү чектелгендерге карата мекендештерибиздин көз карашы, менталдык ой жүгүртүүсү анча жакшы эмес. Дискриминация дароо байкалат. Мен Япониядан такыр баспаган, жакшы сүйлөй албаган бир адамды көрдүм. Бирок анын интелектуалдык ой жүгүртүүсү мыкты болгондуктан, ал киши бул өлкөдөгү белгилүү укук коргоочу экен. Ошондой эле, Америкадан да майыптар арабасында отурган адам бир ири компаниянын ассистенти болуп иштейт экен. Өнүккөн өлкөлөрдө адамдын сырткы келбетинен дагы анын мүмкүнчүлүк, таланттарына баа беришет. А бизде, тилекке каршы, андай эмес”, -деди.

Мүмкүнчүлүгү чектелгендерге шаарда өз алдынча жүрүү дээрлик мүмкүн эмес

Алия ЛОВЗ принт долбоорунун 2-группасынын окуучусу. Ал азыр ири бизнес-долбоорунун үстүнөн иштеп жаткан кези. Буюрса, мүмкүнчүлүгү чектелген жана жардамга муктаж үй-бүлөлөрдү балдарын окуткан инклюзивдүү мектеп ачууну пландоодо.

“Азыр пландын үстүнөн иштеп, инклюзивдүү мектепти Ысык-Көлдө ачууну ойлонуштуруудамын. Мүмкүнчүлүгү чектелгендер билимден артта калбашы керек. Алар өзүлөрүн ар тараптуу өнүктүрүп, жашоодо эмнени кааласа, ага жеткенге болгон күчүн жумшоосу зарыл. Эгер менин долбоорум ишке ашып калса, ал Орто Азиядагы ири долбоорлордон болорун айтышты”, -деген ойлору менен бөлүштү.

Мындан тышкары, полиграфия, 3D принтер, сулуулук салону, автосалон, компьютердик клуб, ксерокөчүрмө, басып чыгаруу иштери боюнча ЛОВЗ принттин башка катышуучулары бизнес-долбоор жазышып, учурда демөөрчү издеп жатышкан кездери.

Эмгекчил жана жашоону сүйгөн долбоордун катышуучулары

Эгер жогорудагы таланты ташкындаган, билими күчтүү, жашоого оптимисттик коз караш менен караган мекендештерибиздин жаңы баштай турган иштерине демөөрчү болуп, өз салымыңызды кошкуңуз келсе, анда 0551 269 269, 0312 61 03 26 номурларына байланышка чыксаңыздар болот.

Мындай кооздуктар ЛОВЗ принт долбоорунун катышуучуларынын колдорунан өтөт

Ошондой эле, полиграфиялык кызматтар (кружка, футболкага сүрөттөрдү түшүрүү, визитка жасоо ж.б.) боюнча ЛОВЗ принт долбооруна кайрылып, буйрутма берүү аркылуу мүмкүнчүлүгү чектелгендерге чоң колдоо көрсөткөн болосуздар.

Башка макалалар