Бишкекте өзгөчө архитектурадагы 5000 кишилик мечит ишке кирди

Мечит 7-кичирайондо курулуп, анын ачылышы, кечээ, 4-апрелде болду. Бул тууралуу жергиликтүү интернет-сайттар жазып чыгышты.

Жаңы ачылган мечит мурдагы президент Алмазбек Атамбаев бөлүп берген жер тилкесинде курулуп, 2010-жылкы апрель окуясында курман болгондордун элесине арналды. Мечит “7-апрель шейиттери” деп аталды.

null

“Мындай мечиттин курулары тууралуу 2016-жылы эле сөз болуп, экс-президент Алмазбек Атамбаев 90-жылдардан бери жеке өзүнө таандык болгон жер тилкесин бөлүп берери айтылган”, -деп жазат “Кактус Медиа”.

Анда айтылгандай, жаңы мечиттин архитектурасы өзгөчө болуп, сапатына кылдаттык менен көңүл бөлүнөт.

“Белгилүү болгондой, алгачкы мечиттер куб түрүндө салынып, Каабаны элестетип турчу. Бул мечит да ошондой. Мечитте атайын аялдар үчүн орун, түрдүү жолугушууларды өткөрүүгө арналган жыйындар залы, ошондой эле, мечиттин территориясында түрдүү диний фонддор орун ала турган бөлмөлөр да болот”, -деп айткан А.Атамбаев.

null

Кошумчаласак, мурдагы өлкө башчысы мечиттин курулушуна жоро-жолдоштору көмөк көрсөткөнүн да айтты.

Салтанаттуу ачылышка муфтий Максатбек ажы Токтомушев жана диний аалым Абдышүкүр Нарматов келди. Мечиттин имам-хатиби болуп Абдышүкүр Нарматов дайындалды.

“Мечитке бардык каалоочулар келет. Анткени бул жер Атамбаевдики же дагы башканыкы эмес. Мунун айынан элдерди бөлүүгө жол бербешибиз зарыл. Мечит бул – Аллахтын үйү. Мусулмандар каалаган мечитинде ибадат кылышат”, -деди Абдышүкүр Нарматов.

Белгилей кетсек, мечиттин жалпы аянты короосу менен биргеликте 2 гектарды түзөт.