Москвада кыргыздар Курман Айтты чоң шаң менен белгилешти

Курман Айттын майрамдык шаңы Москва шаарында мигрант мекендештердин башын кошуп, унутулгус элестерди калтырды. Мындай масштабдуу иш-чара Россияда алгач ирет өтүп жатат.

%article_title%

Кыргызстан мусулмандар дин башкармасынын Россиядагы өкүлчүлүгү жана анын башында турган Сүйүмбек Жусубалиевдин демилгеси менен 2-августта чоң иш-чара өттү.

Москва шаары жана Москва облусундагы кыргыздар бир аянтчада чогулушуп, боз үйлөр тигилип, 20дан ашык кой курмандыкка чалынып, кыргыздын улуттук оюндарын камтыган майрамдык иш-чара болду.

Саамалык тууралуу Сүйүмбек мырза бизге буларды айтып берди:

“Чет жерде өз динибизди, улуттук баалуулуктарыбызды, тилибизди унутпайлы деген максатта ушундай майрамдык иш-чараны уюштурдук. Мекенден алыс жүрсөк да, мекендештер бири-бири менен байланышын үзбөй, минтип чогулуп, акыл-насаат айтышып, руханий дүйнөбүздү бекемдеп турганыбыз баарыбыз үчүн маанилүү. Бул күн көбүнүн эсинде калды деген ишеничтебиз. Эркектерге, аялдарга, жаш балдарга өзүнчө конкурс, оюн-зоок иш-чараларын уюштурдук. Ислам дини тууралуу суроолорду камтыган конкурстар болду. Улуттук оюндарыбыз болгон аркан тартыш, күрөш, ээр тартыш, эңиш оюндарын ойноттук. Жарыштан жеңгендерге Кыргызстан муфтиятынын Россиядагы өкүлчүлүгүндө 1 ай акысыз диний билим алууга сертификаттар тапшырылды”

Эскерте кетсек, буга чейин өкүлчүлүк Кыргызстандын кыйын кырдаалдан эртерээк чыгып кетишин тилеп Москвада чоң түлөө өткөрүшүп, тилек кылышкан.

Сүйүмбек Жусубалиев башында турган Кыргызстан мусулмандар дин башкармалыгынын Россиядагы өкүлчүлүгү мигрант мекендештердин ынтымагын бекемдөөдө, улуттук жана руханий баалуулуктарды таратууда чоң иш-аракеттерди жасап келишет.