Мусулман ишкерлердин башын бириктирген МУСИАД өлкөбүздө кеңсесин ачты

МУСИАД – Ислам принциптерин карманып иштөө менен мусулман ишкерлерди бириктирип, жаңы мүмкүнчүлүктөргө жол ачкан дүйнөлүк деңгээлдеги уюм.

Бизнес чөйрөсүндөгү алдыңкы уюмга мүчө болуу үчүн кыргызстандык ишкерлер үчүн жакшы мүмкүнчүлүк түзүлдү. Көз карандысыз өндүрүшчүлөр жана ишкерлер ассоциациясы Бишкекте өз кеңсесин ачты.

Ачылыш аземине Түркиянын Кыргызстандагы элчиси Ахмет Садык Доган, Кыргызстандын Соода өнөр-жай палатасынын жетекчисинин орун басары Элмира Бакаева, Түркиядан МУСИАД төрагасынын орун басары Давут Алтунбаш баштаган ондон ашык ири ишкерлердин делегациясы, МУСИАДдын Кыргызстандагы активдүү мүчөлөрү, жергиликтүү бизнес өкүлдөрү катышты.

Кыргызстандан азырынча 16 ишкана МУСИАДга мүчө болуу менен соода байланыштарын кеңейтти. Бирикменин башкы максаттарынын бири - Кыргызстан менен Түркия ортосундагы соода жүгүртүүнү 1 млрд. долларга жеткирүү. Муну ишке ашыруу үчүн МУСИАД түрк инвесторлорун Кыргызстанга тартуу, ал эми Кыргызстанда өндүрүлгөн товарларды Түркияга сатууга көмөк көрсөтүүнү көздөйт.

Уюмга мүчө болгон ишкер кандай мүмкүнчүлүктөргө ээ болот?

- Соода байланыштары кеңейип, өнөктөштөрдү табуу;

- Кардарлардын санын арттыруу;

- Орток соода жеңилдиктеринен пайдалануу;

- Чет өлкөдөгү ишкерлер менен эки тараптуу чогулуштар;

- Бюрократиялык жеңилдиктер;

- Көз карашы окшош адамдарды табуу;

- Жарманке жана көргөзмөлөргө катышуу;

- Башка өлкөлөрдө уюштурулган иш сапарларында виза жеңилидктери.

1990-жылы Түркияда түптөлгөн МУСИАД Ислам дүйнөсүндөгү ишкерлерди бириктирип, дүйнөлүк экономикада эң таасирдүү уюмга айланууну максат кылат. Учурда уюмдун 13 миңден ашуун мүчөсү бар. Мүчөлөр 6 миң ишканага ээлик кылып, 2 млн адамды жумуш менен камсыз кылат.

Мындан тышкары, МУСИАД социалдык милдеттерин да аткарып келет. Уюм жетим-жесирлерге, аз камсыз болгон үй-бүлөлөргө жардам көрсөтөт.