Эл аралык семинар: Хатиже Кубра Тонгар

«Умма» журналынын чакыруусу менен Борбор Азияга алгачкы жолу үй-бүлө мамилелери жана бала тарбиялоо боюнча эл аралык деңгээлдеги адис Хатиже Кубра Тонгар Түркиядан келди.

Семинарга мугалимдер, тарбиячылар, мүмкүнчүлүгү чектелген балдардын апаларына, сыноого кабылган аялдарга колдоо көрсөткөн түрдүү фонддун өкүлдөрү, коомдук ишмерлер, устазалар, балдар үйүнүн кызматкерлери, ошондой эле жардамга муктаж аялдар чакырылды.

“Бакырбаган апалар” дүйнөлүк бестселлеринин автору Хатиже Кубранын семинарына катышуу үчүн атайын алыскы региондордон жана коңшу Казакстандан борборго келген коноктор да болду.

Семинардын биринчи бөлүгү үй-бүлө мамилелерин жакшыртуу, никедеги сүйүүнү сактап калуу, түгөйлөр ортосундагы бекем байланыш түзүү темаларынын алкагында болду. Ал эми экинчи бөлүктө баланы бакырбай, кол көтөрбөй тарбиялоо боюнча энелерге мыкты кеңештер берилди.

Катышуучулар жооп таба албай келген суроолорун Хатиже Кубрага берип, адистин өз оозунан ынанымдуу жооп ала алышты.

Иш-чаранын алкагында китеп жарманкеси өтүп, Хатиже Кубранын кыргыз жана түрк тилиндеги китептери арзандатуу менен сатылды. Катышуучулар узун кезекке турушуп, автордун кол тамгасын алууга жана эстеликке сүрөткө түшүүгө мүмкүнчүлүк алышты.

Жогорку Кеңештин 7-чакырылышынын депутаты Динара Ашимова “Ыйман нуру” партиясынын атынан Хатиже Кубра Тонгарга жана үй-бүлө институтун бекемдөөдө, зомбулукту алдын алууда мамлекетке кошкон салымы үчүн “Умма” журналынын башкы редактору Элиана-Марьям Сатаровага ыраазычылык кат тапшырды.

“Бекем үй-бүлө – бактылуу балдар” семинарынын максаты өлкөбүздөгү үй-бүлө институтун бекемдөө, жубайлар ортосундагы мамилени жакшыртуу, кыйкырбаган апа болуу үчүн энелерге жол көрсөтүү, үй-бүлөдөгү зордук-зомбулукту алдын алуу болгон. Семинар бул максатына жетпп, көптөгөн айымдардын жашоосун жакшы тарапка өзгөртө алды десек жаңылышпайбыз.